Еруптираше индонезискиот вулкан Семеру исфрлајќи пепел до 700 метри височина

ИСТАНБУЛ (АА) – Вулканот Семеру денес еруптираше двапати, исфрлајќи пепел до 700 метри над врвот на планината во индонезиската покраина Источна Јава, јавија државните медиуми, пренесува Анадолу.

Вулканот Семеру, кој се наоѓа на границата меѓу окрузите Лумаџанг и Маланг во Источна Јава, при првата ерупција рано наутро исфрлил пепел до 500 метри и таа траела 123 секунди, објави новинската агенција Антара.

Втората ерупција траела 115 секунди, со максимална амплитуда од 22 милиметри.

„На јавноста ѝ е забрането да се движи во радиус од пет километри околу кратерот и врвот на вулканот Семеру, поради ризикот од исфрлени карпи“, изјави Мукас Софјан, службеник во Набљудувачката станица на вулканот Семеру.

Индонезија, која се наоѓа на Огнениот Прстен на Пацификот, има највисоко ниво на сеизмичка активност и вулкански ерупции на глобално ниво, со повеќе од 120 активни вулкани.