ИСЛАМАБАД (АА) - Во пожар и експлозии во фабрика за пиротехника во Карачи, јужниот пристаништен град на Пакистан, денес се повредени 24 лица, соопштија официјални претставници, јавува Анадолу.

Експлозијата се случила откако избувнал голем пожар во фабриката за пиротехникана патот МА Џина во областа Садар во Карачи, изјавија претставници на спасувачката служба 1122 за медиумите на местото на настанот.

Според официјалните лица, 24 лица се повредени и однесени во локалната болница, при што повеќето од нив се здобиле со повреди од скршеното стакло.

Пожарот предизвика силни експлозии во фабриката, оштетувајќи повеќе возила паркирани надвор и ширејќи паника низ густо населената комерцијална зона.

Телевизиските снимки покажуваат пламен кој го проголтува објектот додека пожарникарите се борат да ја стават ситуацијата под контрола.

Причината за пожарот не е утврдена, а полицијата го истражува инцидентот.

Индустриските несреќи се чести во Карачи, првенствено поради несоодветните безбедносни стандарди.