Agnes Szücs
20 Септември 2023•Ажурирај: 22 Септември 2023
БРИСЕЛ (АА) - Европратениците денес одобрија 400 милиони евра (околу 427 милиони долари) помош за Туркије за заздравување од катастрофата изразувајќи најдлабока солидарност со погодените од двата земјотреси што ги погодија јужните региони на земјата во февруари, јавува Анадолу.
Членовите на Комисијата за буџет на Европскиот парламент дадоа зелено светло за „скоро 455 милиони евра помош од Фондот за солидарност на ЕУ за неодамнешните природни катастрофи во Романија, Италија и Туркије“, се вели во соопштението на Европскиот парламент.
Европратениците исто така ја изразија својата „најдлабока солидарност со жртвите, нивните семејства и сите поединци погодени од природните катастрофи во Романија, Италија и Туркије“, се додава во соопштението.
Одлуката ќе го измени буџетот на ЕУ, со што на Туркије ќе ѝ припадне најголем дел од новиот пакет помош.
Романија и Италија ќе добијат 33,9 милиони евра, односно 20,9 милиони евра за помош во закрепнувањето од тешките суши и поплави.
Пленарната седница на Европскиот парламент допрва треба да го одобри амандманот на буџетот, но тоа треба да биде само формалност по одлуката на Комисијата за буџет и минатонеделното зелено светло од земјите членки на ЕУ.
На 6 февруари, земјотреси со јачина од 7,7 и 7,6 степени според Рихтеровата скала ги погодија јужниот и југоисточниот дел на Туркије, во кои животот го изгубија над 50.000 луѓе.
Од земјотресите беа погодени 13,5 милиони луѓе во 11 турски области: Кахраманмараш, Хатај, Газиантеп, Адијаман, Малатија, Адана, Дијарбакир, Килис, Османије, Шанлиурфа и Елазиг.
