Европол ја нагласи заканата од терористичката ПКК за Европската Унија

АТИНА (АА) - Европол, Агенцијата за спроведување на законот на Европската Унија, ја истакна заканата што терористичката организација ПКК ја претставува за земјите членки на блокот, јавува Анадолу.

Агенцијата, во својот годишен извештај за тероризмот, откри дека членовите на некои европски екстремно левичарски групи и анархисти тренирале и се бореле со терористите на ПКК во Северен Ирак, југоисточна Туркије и во североисточна Сирија, каде што беа повеќето од нападите на терористичката организација.

„ПКК е многу активна во ЕУ, најчесто користејќи ги земјите членки како бази за административни цели, за регрутирање и финансирање“, се наведува во извештајот и се додава дека трговијата со дрога и измамите се меѓу нејзините главни извори на приходи во ЕУ што се користат за финансирање терористички кампањи.

Се нагласува дека ПКК, исто така, оперира со широк пропаганден апарат низ Европа.

Според Европол, во 2022 година Германија уапсила четири лица, а Италија едно лице поради поврзаност со ПКК.

Во својата над 35-годишна терористичка кампања против Туркије, ПКК, која е ставена на листата на терористички организации од страна на Туркије, Соединетите Американски Држави, Велика Британија и Европската Унија, е одговорна за смртта на над 40.000 луѓе, меѓу кои и жени и деца.