Еврејски доселеници упаднаа во комплексот на џамијата „Ал Акса“ по повод одбележувањето на еврејската Нова година

ЕРУСАЛИМ (АА) - Стотици еврејски доселеници денес насилно упаднаа во комплексот на џамијата „Ал Акса“ во окупираниот Источен Ерусалим (Источен Кудс) за да ја прослават еврејската Нова година, јавува Анадолу.

Еврејските доселеници го одбележуваат празникот Рош Хашана (Нова година) од 15 септември до 17 септември оваа година. Тие ќе го одбележат и празникот Сукот на крајот на септември и празникот Симхат Тора на 6 октомври.

Одделот за исламски вакуф, раководен од Јордан, истакна дека израелските сили го испразниле комплексот „Ал Акса“ од палестински верници пред да им дозволат на доселениците да влезат.

Според соопштението, Палестинците помлади од 50 години биле спречени да влезат во комплексот.

Голем број Палестинци кои се наоѓале внатре во комплексот се приведени од израелските сили, соопштија локални извори.

Нема коментар од израелските власти за приведувањата.

За муслиманите, „Ал-Акса“ претставува трето најсвето место во светот. Евреите, од своја страна, ја нарекуваат оваа област Планина на храмот, сметајќи го за место на два древни еврејски храма.

Израел го окупира Источен Ерусалим, каде што се наоѓа комплексот „Ал Акса“, за време на Арапско-израелската војна во 1967 година. Го анектира целиот град во 1980 година, анексија која меѓународната заедница никогаш не ја призна.