Дванаесет лица загинаа во израелски напад на палестинска куќа во Газа

ГАЗА (АА) - Најмалку 12 Палестинци загинаа, а голем број се повредени кога израелски воени авиони денес извршија напад врз куќа во централниот дел на Појасот Газа, соопшти Министерството за внатрешни работи во блокираната енклава, јавува Анадолу.

Очевидци изјавија дека нападот предизвикал масовно уништување во близина на куќата во градот Деир ал Балах.

Израел започна постојани воздушни и копнени напади врз Појасот Газа по прекуграничниот напад на палестинската група Хамас на 7 октомври.

Оттогаш загинаа најмалку 10.569 Палестинци, меѓу кои 4.324 деца и 2.823 жени. Бројот на загинати во Израел достигна речиси 1.600, според официјалните податоци.

Покрај големиот број жртви, масовните раселувања и илјадниците згради срамнети со земја, основните резерви за 2,3 милиони жители на Газа се при крај поради израелската опсада.