Германија: Едно лице загина, неколкумина се повредени откако автомобил влета во толпа луѓе во Манхајм

БЕРЛИН (АА) - Најмалку едно лице загина, а неколкумина се повредени откако автомобил влета во пешаци во германскиот град Манхајм, соопштија денес германските власти, јавува Анадолу.

Портпаролот на полицијата, Стефан Вилхелм, за новинарите изјави дека неколкумина од повредените се хоспитализирани во тешка состојба, но не можеше да даде точна бројка.

„Може да потврдиме дека еден сторител е уапсен. Дали имало други сторители, во моментов не може да дадеме никакви информации бидејќи истрагата сѐ уште е во тек“, рече тој.

Локалните власти објавија соопштение на X во кое ги замолија граѓаните да не излегуваат надвор и да го избегнуваат центарот на градот поради тековната полициска операција.

Властите не потврдија дали инцидентот го третираат како терористички напад. Идентитетот и мотивот на осомничениот не се познати. Полицијата соопшти дека повеќе детали ќе обезбеди во текот на денот кога ќе станат достапни дополнителни информации.