Ahmet Gençtürk
09 Ноември 2022•Ажурирај: 10 Ноември 2022
АНКАРА (АА) - Дваесет и четиричасовниот генерален штрајк во Грција, кој започна во 5:00 часот утрово, го парализира секојдневниот живот и економските активности низ земјата, јавува Агенција Анадолија (АА).
Организиран од големите синдикати и во јавниот и во приватниот сектор, на штрајкот низ целата земја се протестира против превисоките цени на енергијата и високите животни трошоци.
Синдикатите бараат пониски даноци и зголемување на минималната плата, која моментално изнесува 710 долари.
Во штрајкот учествува работната сила во земјата, вработените во јавниот транспорт во главниот град Атина и во вториот по големина град Солун, таксистите, вработените во бродската индустрија, работниците на пристаништето Пиреја, најголемото пристаниште во земјата, медиумските работници и други.
Опозициските партии најавија поддршка за штрајкот и ги повикаа своите поддржувачи да излезат на улиците за да покажат солидарност со работниците кои штрајкуваат.
Најголемата опозициска партија СИРИЗА-ПС ги повика граѓаните да го поддржат штрајкот.
„Земјата се наоѓа во исклучително критична фаза. Време е граѓаните да испратат силна порака до Владата дека нашата толеранција истече. На Грција итно ѝ се потребни политички промени и нова прогресивна влада која ќе ја извади од ќор-сокакот на економската сиромаштија и демократска аномалија“, се наведува во соопштението.
Димитрис Куцумбас, лидерот на Комунистичката партија на Грција, беше дел од демонстрациите во центарот на Атина.
„Денешниот голем штрајк испраќа порака до цела Грција, до цела Европа, дека грчкиот народ нема да стане соучесник во политиката на владејачката класа и ЕУ против обичниот народ“, рече тој.
