Генералниот секретар на ОН изјави дека праведниот мир мора да го почитува територијалниот интегритет на Украина

БЕРЛИН (АА) – Генералниот секретар на Обединетите нации (ОН), Антонио Гутереш, денес нагласи дека праведниот мир во Украина мора да се темели врз меѓународното право и почитувањето на територијалниот интегритет на земјата, известува Анадолу.

Гутереш на прес-конференцијата во Берлин повтори дека Обединетите нации постојано повикуваат на итен и безусловен прекин на огнот во Украина.

„Сметаме дека прекинот на огнот мора да биде чекор кон решение, а за нас решението е праведен мир“, рече Гутереш.

„А праведен мир за нас значи мир што ги почитува Повелбата на ОН, меѓународното право и резолуциите на Генералното собрание на ОН, вклучително и територијалниот интегритет на Украина“, додаде тој.

Гутереш нагласи дека почитувањето на меѓународното право е клучно за зачувување на мирот и стабилноста во време на зголемени тензии и конфликти низ целиот свет.

„Верувам дека е исклучително важно, во време како ова, да преовлада меѓународното право. Денот кога ќе се откажеме од неговата одбрана, ќе го отвориме патот кон хаос низ целиот свет“, нагласи тој.

Генералниот секретар повтори дека ОН се подготвени да им дадат поддршка на евентуалните мировни преговори за Украина, но нагласи дека тоа зависи од подготвеноста на двете страни.