Mohammad Sıo
29 Јули 2024•Ажурирај: 31 Јули 2024
ГАЗА (АА) - Општина Рафа во јужниот дел на Појасот Газа денес го осуди кревањето во воздух на резервоарот за вода за пиење во населбата Тал ал-Султан од страна на израелската војска како сериозно кршење на хуманитарните норми, јавува Анадолу.
„Детонирањето на главниот резервоар за вода од страна на израелските војници во Тал ал-Султан е злосторство против човештвото и ја продолжува политиката на колективно казнување“, истакна градоначалникот на Рафа, Ахмед Суфи.
Инцидентот го вклучи алармот за влошување на кризата со вода во подрачјето.
„Уништувањето на резервоарот за вода ќе ја влоши кризата во градот и ги повикуваме инволвираните меѓународни субјекти да интервенираат и да ги запрат злосторствата на израелската окупација“, порача градоначалникот.
Претходно во текот на денот израелската Армија призна дека нивните војници се одговорни за бомбардирањето на резервоарот за вода во Тал ал-Султан. Според израелскиот дневен весник Хаарец, започната е истрага.
Еден од војниците објави видео од експлозијата на социјалните мрежи со наслов „Уништување на резервоарот за вода во Тел Султан во чест на Шабат“, објави весникот.
Во последниве денови, меѓу активистите циркулираше видео на социјалните мрежи на кое се гледа како израелски војник поставува експлозивна направа на главниот резервоар за вода во Тал ал-Султан, по што следуваше детонација.
Локалните институции и општините во Газа континуирано ја обвинуваат израелската војска за намерно уништување на водната инфраструктура, бунарите и постројките за десалинизација, што ја влошува кризата со вода за пиење.
Исто така, ограничувањата за гориво наметнати од Израел дополнително ја попречија работата на преостанатите капацитети за десалинизација во регионот.
Не почитувајќи ја резолуцијата на Советот за безбедност на Обединетите нации со која се бара итен прекин на огнот, Израел спроведува брутални напади со неселективно бомбардирање на цивилните населби, училишта, верски објекти и болници во Појасот Газа почнувајќи од 7 октомври минатата година.
По повеќе од девет месеци израелски напади, големи делови од Газа се во урнатини.
Според локалните здравствени власти, оттогаш се убиени над 39.360 Палестинци, главно жени и деца, а над 90.900 се повредени.
Израел е обвинет за геноцид од Меѓународниот суд на правдата, кој му нареди на Тел Авив веднаш да ја прекине својата воена операција во јужниот град Рафа.
