Време на лалиња во Холандија: Цветната градина „Кукенхоф“

АМСТЕРДАМ (АА) - Холандскиот град Кукенхоф се смета за најголема градина на лалиња (тулипани) на светот. Оваа година, украсената градина ги дочекува посетителите со темата „Романса во цвеќе“, јавува Anadolu Agency (AA).

Сместена недалеку од градот Лисе, местото Кукенхоф, секоја година со различни декоративни концепти, ги привлекува не само претставниците на градинарските работи од светот, туку и бројни фотографи и љубители на цвеќето. Цветната градина името го добила по замокот Кукенхоф.

Манифестацијата, поради кусиот век на лалињата е отворена од крајот на март до средината на мај, а оваа година до 13 мај.

Фокусот на паркот е врз речиси 7 милиони единечни цвеќиња, факт кој на бројни компании им овозможува да го претстават својот живописен каталог. Околу 500 одгледувачи имаат можност да изложат широка палета на цвеќиња.

Тимови на експерти се обидуваат на секој изложувач да му овозможат посебен простор за изложување.

Околу 20 одгледувачи во 1949 година дошле на идеја да организираат манифестација во облик на изложба на цвеќе. По оваа идеја, Кукенхоф се претворил во пролетен парк.

Манифестацијата за јавноста била отворена во 1950 година и веднаш забележала успех. Цветната градина во Кукенхоф тогаш била посетена од 236.000 луѓе. Оваа година се одржува 69. издание, а организаторите и овој пат очекуваат голем број посетители.