Oktaj Omeragikj
26 Ноември 2024•Ажурирај: 27 Ноември 2024
ТЕХЕРАН (АА) - Откако Меѓународниот кривичен суд (МКС) издаде налог за приведување на израелскиот премиер Бенјамин Нетанјаху и поранешниот израелски министер за одбрана Јоав Галант за воени злосторства и злосторства против човештвото извршени во Газа, на улиците на Техеран се закачени постери со слики на Нетанјаху и Галант. На џиновскиот постер поставен на плоштадот Палестина пишува „барани криминалци“, а Нетанјаху и Галант се прикажани во затворска облека и зад решетки, известува Анадолу.
Минатата недела Меѓународниот кривичен суд објави дека издал налози за приведување на израелскиот премиер Бенјамин Нетанјаху и на поранешниот министер за одбрана Јоав Галант поради воени злосторства извршени на палестинските територии, вклучително и во Газа.
На 21 ноември Хашкиот трибунал објави дека издал налози за приведување на две лица, Бенјамин Нетанјаху и Јоав Галант, за злосторства против човештвото и воени злосторства извршени најмалку од 8 октомври 2023 година до најмалку 20 мај 2024 година, ден кога Обвинителството поднесе барања за приведување.
Во однос на нивните наводни злосторства, судот нагласи дека „нашол разумна основа“ дека и Нетанјаху и Галант „сносат кривична одговорност за следниве злосторства како соизвршители за извршување на делата заедно со други: военото злосторство изгладнување како метод на војување и злосторствата против човештвото за убиства, прогон и други нечовечни дела“.
Налозите се издадени откако израелската геноцидна офанзива во Газа неодамна влезе во втора година, во која досега се убиени повеќе од 44.230 Палестинци, повеќето жени и деца, а над 104.600 се повредени.
Поради израелската офанзива е раселено речиси целото население на територијата, а тековната блокада доведе до сериозен недостиг на храна, чиста вода и лекови, оставајќи го населението на раб на глад.
