Во Парламентот на Белгија побарано да се бојкотираат производите од нелегалните еврејски населби

БРИСЕЛ (АА) - Во федералниот Парламент на Белгија е претставен нацрт-закон за бојкот на производите произведени во илегалните еврејски населби, известува Анадолу.

Овој нацрт-закон следуваше по бруталните израелски напади на Газа.

Во белгискиот Парламент има сѐ повеќе гласови за бојкот на производите од нелегалните еврејски населби изградени на палестинска територија за време на израелската окупација.

Застапничката на Фламанско-демохристијанската партија, Елс ван Хуф, пред Парламентот го претстави нацрт-законот за бојкот.

Министерката за развојна соработка Каролин Генез од Фламанската социјалистичка партија Воруит најави поддршка на овој закон.

Белгиските медиуми објавија дека Фламанската зелена партија (Зелени), Зелената партија на француското говорно подрачје (Еколо) и Социјалистичката партија ПС, исто така, го поддржаа овој нацрт-закон.

Еколо ги поддржува и санкциите, како што е замрзнување на имотот и забрана за издавање виза за еврејските доселеници и воените злосторници.

Партијата Зелени планира да ѝ предложи на белгиската министерка за надворешни работи, Хаџи Лахбиб, да го отповика белгискиот амбасадор во Израел доколку наскоро не се постигне прекин на огнот.

Европската Унија (ЕУ) во 2015 година започна практика на раздвојување на продуктите произведени во еврејските населби на окупираната палестинска територија и продукти произведени во Израел. Оваа политика им овозможува на потрошувачите во 27 земји членки на ЕУ, кои благодарение на етикетата можат да го откријат потеклото на производот, да ги бојкотираат производите што се увезуваат од нелегалните еврејски населби.