ВО ЖИВО - Меѓународниот суд на правдата го започна jавното сослушување за израелските практики во Палестина

АНКАРА (АА) – Јавното сослушување во Меѓународниот суд на правдата (МСП) за израелските практики во Палестина започна денес, јавува Анадолу.

Јавното сослушување започна по барањето на Генералното собрание на ОН за советодавно мислење за правните последици што произлегуваат од политиките и практиките на Израел на окупираната палестинска територија, вклучувајќи го и Источен Ерусалим.

Резолуцијата на Генералното собрание побара од МСП да ги утврди правните последици „кои произлегуваат од тековното кршење од страна на Израел на правото од палестинскиот народ на самоопределување“ и „од неговото усвојување на поврзаните дискриминаторски закони и мерки“.

Од 19 до 26 февруари, претставници на 52 држави, вклучувајќи ја и Туркије, на Арапската лига, Организацијата за исламска соработка и на Африканската унија, ќе ги претстават своите аргументи во врска со законитоста на израелската окупација на палестинските територии, вклучувајќи го и Источен Ерусалим.

Јужна Африка поднесе случај за геноцид против Израел до МСП на крајот на декември и побара од него да одобри итни мерки за да се стави крај на крвопролевањето во Газа, каде што повеќе од 28.600 Палестинци се убиени од 7 октомври.

Судот на 26 јануари му нареди на Израел да ги преземе „сите мерки што се во негова моќ“ за да ги спречи актите на геноцид во Газа, но не нареди прекин на огнот.

Исто така, му нареди на Израел да преземе „итни и ефективни“ мерки за да овозможи обезбедување на итно потребните основни услуги и хуманитарна помош во Појасот Газа.

Израел започна смртоносна офанзива против Појасот Газа по нападот на Хамас на 7 октомври. Во израелските напади досега загинаа 29.000 Палестинци, а 69.028 се повредени. Се верува дека околу 1.200 Израелци се загинати во нападот на Хамас.

Според податоците на Обединетите нации, поради израелската офанзива, 85 отсто од населението на Појасот Газа е внатрешно раселено и се соочува со акутен недостиг на храна, чиста вода и лекови, додека 60 отсто од инфраструктурата на енклавата се оштетени или уништени.