Британскиот министер Клеверли: Бомбардирањето на браната Каховка во Украина е воено злосторство

ЛОНДОН (АА) - Британскиот министер за надворешни работи Џејмс Клеверли истакна дека бомбардирањето на браната „Каховка“ во Украина е воено злосторство и напад врз цивилната инфраструктура, пренесува Анадолу.

Британскиот министер Клеверли во објава на Твитер го опиша нападот како „страшен чин“.

„Нападот што како цел ја имаше цивилната инфраструктура е воено злосторство. Британија е подготвена да ја поддржи Украина и оние кои се погодени од оваа катастрофа“, рече тој.

Експлозиите во хидроелектраната „Каховка“ на реката Днепар во близина на Керсон, во јужна Украина, предизвикаа поплави денес, додека Москва и Киев меѓусебно се обвинуваат за уништување на браната.

Украинскиот претседател Владимир Зеленски на Твитер напиша дека уништувањето на браната „потврдува пред целиот свет дека тие (руските сили) мора да бидат протерани од секој агол на украинската територија“.

Од друга страна, Владимир Леонтјев, челникот на градот Нова Каховка, на источниот брег на реката Днепар, кој е под руска контрола, преку Телеграм рече дека нападите во текот на ноќта на Украинските вооружени сили довеле до уништување на вентилите, а со тоа и до неконтролирано ослободување на водата низводно.