Азербејџан соопшти дека ерменските вооружени групи пукале врз воени позиции во регионот Агдам

ИСТАНБУЛ (АА) - Баку денес соопшти дека илегалните ерменски вооружени групи пукале врз позициите на азербејџанската војска во областа Агдам во регионот Карабах, јавува Анадолу.

„На 3 јули припадниците на илегалните ерменски вооружени групи на територијата на Азербејџан, каде што привремено се стационирани руски мировници, пукаа врз позициите на нашата армија лоцирани во правец на регионот Агдам“, се вели во соопштението на азербејџанското Министерство за одбрана.

Во соопштението се вели дека азербејџанската армија презела „соодветни мерки за одговор“ во областа, додавајќи дека членовите на илегалните ерменски вооружени групи, исто така, се обиделе да изградат „долгорочни уреди за утврдување“.

„Како резултат на итните мерки преземени од нашите единици, работите веднаш беа прекинати“, се заклучува во соопштението.

Односите меѓу двете поранешни советски републики Ерменија и Азербејџан се тензични од 1991 година, кога ерменската војска го окупира Нагорно-Карабах, територија меѓународно призната како дел од Азербејџан и седум соседни региони.

Есента 2020 година, во 44-дневни судири, Азербејџан ослободи неколку града, села и населби од ерменска окупација. Мировниот договор постигнат со посредство на Русија беше прославен како триумф во Азербејџан.

И покрај тековните разговори за мировен договор меѓу Баку и Ереван, тензиите меѓу соседните земји ескалираа во последниве месеци поради коридорот Лачин, кој служи како единствена копнена маршрута и ѝ обезбедува пристап на Ерменија до Карабах.