Mahmut Geldi
16 Декември 2020•Ажурирај: 17 Декември 2020
БЕЈРУТ (АА) - „Хјуман рајтс воч“ (Human Rights Watch, HRW) ги повика властите на Саудиска Арабија да престанат со нехуманиот третман на стотици мигранти во Центарот за депортација во главниот град Ријад, пренесува Агенција Анадолија (АА).
Во извештајот, заедно со видеоснимки, објавен од страна на „Хјуман рајтс воч“, со седиште во Њујорк, се наведува дека администрацијата на Саудиска Арабија држи стотици мигранти, повеќето од нив граѓани на Етиопија, во „понижувачки и нехумани“ услови во главниот град Ријад.
Се посочува дека телефонски е разговарано со седуммина мигранти од Етиопија сместени во Центарот за депортација во Ријад и двајца мигранти од Индија, кои биле приведени во истиот центар, а потоа биле депортирани со образложение дека немаат дозвола за работа и престој.
Во извештајот, во кој се вклучени и видеоснимки, се гледа дека стотици луѓе се држат во центарот едни до други, заедно со сметот.
„Сите мигранти со кои контактира „Хјуман рајтс воч“ (HRW) истакнаа дека властите на Саудиска Арабија ги држеле со месеци во валкани и полни простории заедно со други 350 мигранти. Во центарот се држат дури и повеќе од една година. Мигрантите раскажаа дека лежат едни врз други, затоа што не можат да најдат простор за да легнат. Снимките до кои стигнавме, исто така го потврдуваат она што го кажаа сведоците“, се наведува во извештајот.
- „Тројца мигранти починаа од раните што ги добиле како резултат на физичката тортура“ -
Меѓу другото, во извештајот се додава дека мигрантите биле подложени на вербално и физичко мачење и закани од стражарите во Центарот за депортација.
„Бевме нападнати од стражари кои носеа различни униформи, а бевме сведоци и на тоа дека некои мигранти беа тепани со железни палки обвиени со пластика. Мигрантите кои бараа медицинска помош или имаа други поплаки беа тепани. Еден 27-годишен мигрант од Етиопија беше сведок на нелегално убиство на тројца мигранти во центарот. Две од трите лица животот го загубија веднаш по повредите претрпени како резултат на силните удари од стражарите. Третото лице почина потоа“, истакнале мигрантите, стои во извештајот.
„И покрај тоа што кај некои мигранти биле забележани симптоми на Ковид-19, властите на Саудиска Арабија не презеле соодветни мерки“, се нагласува во извештајот и се повикува Саудиска Арабија да стави крај на нехуманите практики врз мигрантите.
Во извештајот се цитира и Надије Хардман, која работи во Дирекцијата за бегалци и мигранти на „Хјуман рајтс воч“ (HRW).
„За Саудиска Арабија, една од најбогатите земји во светот, нема никакво оправдување да држи работници мигранти под овие услови со месеци, во период кога заканата од епидемијата продолжува“, нагласи Надије Хардман.
