Elena Teslova
24 Февруари 2026•Ажурирај: 24 Февруари 2026
МОСКВА (АА) - Портпаролот на Кремљ, Дмитриј Песков, денес изјави дека Русија останува доследна во својот став во врска со конфликтот во Украина и прави сѐ за да постигне мир по дипломатски пат, јавува Анадолу.
Говорејќи на брифингот во Москва, Песков рече дека уште од почетокот биле направени напори конфликтот да се реши мирно и дека во март 2022 година во Истанбул бил разработен договор.
„Потоа, по интервенцијата на Велика Британија во овој мировен процес, работите повторно се вратија на воен колосек“, изјави тој.
Бидејќи, како што наведе, не било можно конфликтот да се реши по мирен пат, „специјалната воена операција“ продолжува, но во исто време Русија останува отворена за остварување на своите цели преку политички и дипломатски средства.
Продолжува работата во таа насока, а сега, според него, сѐ зависи од постапките на „режимот во Киев“, додавајќи дека Русија „прави сѐ за да постигне мир“.
„Главна цел е да се осигури безбедноста на луѓето што живееле во Источна Украина и кои навистина биле во смртна опасност. Тоа е најважно“, рече Песков.
Тој истакна дека времето и местото на нова рунда преговори за украинското прашање сѐ уште не се договорени.
„Во моментов не можам да потврдам точни датуми, тие сѐ уште треба конечно да се усогласат. Навистина се надеваме дека оваа работа ќе продолжи“, рече Песков.
Според него, „од одреден момент“ конфликтот во Украина престанал да биде само „воена операција против режимот во Киев“ и прераснал во конфронтација меѓу Русија и Западот кој, како што рече, директно се вмешал во конфликтот „во обид да ја скрши Москва“.
Песков нагласи дека Русија ќе го земе предвид искуството од последните четири години во своите идни чекори на меѓународната сцена и во градењето односи со голем број држави и меѓународни организации.
„Очите на Русија се отворија кон многу меѓународни процеси, кон тоа како понатаму да се градат односите со многу меѓународни организации и главни градови“, изјави тој.
Тој додаде дека „ова се многу важни четири години“ во историјата на Русија, земјата ќе се движи напред, овој пат „секогаш ќе остане во сеќавањето на луѓето“ бидејќи Русија и Русите многу се сменија во однос на консолидацијата и „созревањето на општеството“.
„И Русија и Русите навистина многу се сменија во последните четири години. Имаше феноменална консолидација на општеството околу претседателот, веројатно имаше созревање на општеството во однос на разбирањето на нашите корени, во однос на разбирањето што е добро, а што лошо низ целиот свет, во меѓународните односи“, рече тој.
Во однос на медиумските извештаи дека Русија и САД одржале разговори за контрола на вооружувањето во Женева на 17 и 18 февруари, Песков рече: „Засега немам што да кажам на таа тема.“
