ХАГ (АА) - Имињата и возраста на над 65.000 Палестинци убиени во нападите на Израел врз Газа беа читани гласно со повторување пред зградата на холандското Министерство за надворешни работи цели 50 дена, јавува Анадолу.

Протестот, организиран од Фондацијата на палестинската коалиција во Ротердам пред Министерството за надворешни работи во Хаг, трае непрекинато секој понеделник и четврток 24 часа.

Акцијата има цел да изврши притисок врз холандската Влада да преземе конкретни чекори против Израел.

И минувачи му се придружија на протестот, поддржувајќи ги волонтерите што бдеат дење и ноќе во смени, читајќи од списокот со имиња.

Активистите имаат намера да продолжат сè додека холандската Влада не воведе сериозни санкции за Израел.

Маргрет Оеле, координаторка на Фондацијата на палестинската коалиција во Ротердам, рече дека тие го продолжуваат протестот со цел да извршат притисок врз министерот за надворешни работи и Владата.

„За жал, не добивме официјален одговор од Министерството. Во текот на периодот колку што сме тука, имавме тројца министри за надворешни работи. Ги поканивме, но тие дури и не се потрудија да дојдат или да коментираат.“

Истакнувајќи го ужасот од геноцидот на Израел, Оеле рече: „Холандија е соучесник во геноцидот во Газа. Ова е неспорно. Холандија може да направи многу за да го зголеми притисокот врз Израел. Затоа сме тука. Се надеваме дека ќе се разбере дека Министерството мора да преземе мерки.“

Таа нагласи дека тие ќе продолжат со овој протест сè додека Холандија не воведе сериозни санкции за Израел и „не го прекине своето соучесништво во геноцидот во Газа“.

Истражителите на Обединетите нации неодамна донесоа заклучок дека Израел врши геноцид во Газа, каде што од октомври 2023 година се убиени над 65.400 Палестинци.