Ерменскиот тим од Карабах пристигна во градот Јевлах на разговори со азербејџанските власти

МОСКВА (АА) - Делегација на ерменското население на Карабах пристигна денес во градот Јевлах на средба со азербејџанските власти, јавува Анадолу.

Ерменските претставници се придружувани од руските мировници, објави азербејџанската државна новинска агенција „Тренд“.

Азербејџан во вторникот соопшти дека започнал антитерористички мерки во Карабах за да ги поддржи одредбите наведени во трилатералниот мировен договор со Русија и Ерменија за ставање крај на конфликтот во 2020 година.

Во средата наутро, азербејџанското Министерство за одбрана соопшти дека одлучило да ги запре операциите според договорот постигнат со командата на рускиот мировен контингент.

Тензиите меѓу Азербејџан и Ерменија започнаа во 1991 година кога ерменската војска го окупира Карабах, територија меѓународно призната како дел од Азербејџан, и уште седум соседни региони.

Есента 2020 година Азербејџан ослободи неколку градови, села и населби од ерменската окупација во текот на 44-дневните судири. Војната заврши со прекин на огнот со посредство на Русија.

Тензиите меѓу двете земји, сепак, продолжија и покрај тековните разговори за долгорочен мировен договор.