„Да не беше храброста и одлучноста на палестинските новинари не би ги разбрале размерите на трагедијата во Газа“

ИСТАНБУЛ (АА) - Генералниот комесар на Агенцијата на Обединетите нации за помош на палестинските бегалци на Блискиот Исток (УНРВА), Филип Лазарини, ја пофали храброста на новинарите кои посветено известуваат за израелските напади на Појасот Газа, известува Анадолу.

Лазарини упати порака по повод 3. мај - Светскиот ден на слободата на медиумите.

Тој истакна дека Газа е место каде во судирите досега животот го загубиле најмногу новинари во светот.

„Има и многу повредени новинари, вклучувајќи го и фоторепортерот на УНРВА, Абдула, кој остана без нога во израелски напад во северниот дел на Појасот Газа. Да не беше храброста и одлучноста на палестинските новинари, не би ги разбрале и сфатиле размерите на трагедијата во Газа“, рече Лазарини.

Според податоците на Канцеларијата за медиуми на Владата во Газа, во нападите на израелската војска на Појасот Газа од 7. октомври 2023 година досега се убиени најмалку 141 новинар, 70 се повредени, а десетици се приведени.