Американскиот потпретседател се сретна со израелскиот премиер за да разговараат за прекин на огнот во Газа

ИСТАНБУЛ (АА) - Потпретседателот на Соединетите Американски Држави (САД), Џ.Д. Венс, денес се сретна со израелскиот премиер Бенјамин Нетанјаху за да разговараат за спроведувањето на договорот за прекин на огнот во Газа, пренесува Анадолу.

Според соопштението од Кабинетот на премиерот, Нетанјаху и неговата сопруга Сара ги пречекале потпретседателот на САД и неговата сопруга Уша во канцеларијата на премиерот во Ерусалим.

Не се откриени повеќе детали за содржината на разговорот.

Се очекува Венс по разговорите со Нетанјаху да се сретне со израелскиот претседател Исак Херцог, според израелските медиуми.

Американскиот потпретседател пристигна во Израел вчера во тридневна посета со цел да го разгледа спроведувањето на прекинот на огнот што стапи на сила на 10 октомври во Газа и да разговара за втората фаза од планот на американскиот претседател Доналд Трамп со високи израелски претставници.

Првата фаза опфаќаше ослободување на израелските заложници во замена за палестинските затвореници.

Планот, исто така, предвидува обнова на Газа и воспоставување нов управувачки механизам без Хамас.

Според Министерството за здравство на Газа, од октомври 2023 година во израелската геноцидна војна се убиени над 68.200 Палестинци, а повеќе од 170.300 се повредени.