Beyza Binnur Dönmez
16 Јануари 2026•Ажурирај: 19 Јануари 2026
ЖЕНЕВА (AA) – Австриската Влада објави сет национални мерки за спроведување на новиот Заеднички европски систем за азил на Европската Унија, вклучително и подолги аеродромски процедури и проширени можности за санкционирање на барателите на азил, јавува Анадолу.
Јавниот радиодифузен сервис OРФ вчера објави дека пакетот им овозможува на властите да ги задржуваат барателите на азил што пристигнуваат по воздушен пат на аеродромот „Виена-Швехат“ до 18 недели, што претставува продолжување на сегашниот рок од шест недели.
Министерот за внатрешни работи Герхард Карнер изјави дека реформите ќе им „ја одземат бизнис-основата на шверцерите“, презентирајќи ги мерките заедно со државниот секретар Јорг Лајтфрид и министерката за надворешни работи Беате Мајнл-Раизингер. Карнер, според извештајот, наведе дека новите правила отвораат можност за формирање центри за апликации и таканаречени „излезни центри“, додавајќи: „Миграциската транзиција ќе функционира само ако ги искористиме проширените можности.“
Лајтфрид истакна дека Австрија ќе спроведува „конзистентни враќања“, а Мајнл-Раизингер ја нагласи потребата од „организирање и контролирање на миграцијата и доследно спроведување на враќањата“, укажувајќи на нови миграциски договори што овозможуваат реадмисија.
Според планот, сите аеродромски постапки за азил ќе бидат централизирани во Виена, а признатите бегалци ќе бидат обврзани да потпишат задолжителна „Повелба на вредности“, наведува ОРФ.
„Во иднина, сите баратели на азил ќе ја потпишуваат ‘Повелбата на вредности’ како вид куќен ред, кој се однесува на признавање на основните вредности на нашата република, нашата демократија и нашата уставна држава“, изјави Лајтфрид, предупредувајќи дека се можни санкции доколку не се почитуваат правилата.
Владата, исто така, планира да воведе дополнителни можности за санкции во рамките на основната грижа, преку дефинирање нови прекршоци што ќе овозможат изрекување казни во случаи на недолично однесување, изјави Карнер при претставувањето на националната примена на правилата на ЕУ.
Во пакетот се предвидува и проширување на собирањето биометриски податоци, како и намалување на старосната граница за регистрација од 14 на шест години.
Опозициските партии ги критикуваа плановите. Пратеничката од Зелените, Сигрид Маурер, изјави дека мерките „јасно спаѓаат во категоријата шоу-политика“.
