ЖЕНЕВА (АА) – Климатските промени не ги менуваат само екосистемите и човечките активности туку имаат и силно емоционално влијание врз научниците што ги проучуваат, покажува нова анкета на „Свисинфо“ спроведена меѓу истражувачи во Швајцарија, јавува Анадолу.

Според анкетата, во која учествувале 80 климатски истражувачи, 72% изјавиле дека се чувствуваат емоционално погодени од својата работа или од еволуцијата на климатските промени. Од нив, 41% го чувствуваат тоа повремено, а 31% неколкупати неделно.

Само 6% од научниците изјавиле дека не доживуваат никаква посебна емоционална реакција.

„Многу сум загрижен за среднорочните последици од климатските промени. Имам ќерка и се прашувам во каков свет ќе живее“, изјави за „Свисинфо“, Пјер Воленвајдер, истражувач по шумска екологија во Швајцарскиот федерален институт за истражување на шумите, снегот и пејзажите.

Голем дел од научната заедница повеќе не верува дека е можно да се ограничи глобалното затоплување на 1,5 Целзиусови степени над претиндустриското ниво, што е најамбициозна цел на Парискиот договор.

„Обесхрабреност и тага доминираат кога ќе помислам на тоа што е направено политички“, изјави Соња Сеневиратне, климатолог на ЕТХ Цирих.

Сепак, таа додаде дека денес има повеќе надеж отколку пред две децении:

„Порано бев многу повеќе песимистична затоа што тогаш немавме решенија. Денес ги имаме, иако е фрустрирачки што е толку тешко да се донесат одлуки што би биле сосема рационални.“