Ivana Ramadanova
23 Јуни 2016•Ажурирај: 24 Јуни 2016
СКОПЈЕ (АА) - Лидерот на најголемата опозициска партија, Зоран Заев, на денешната прес-конференција изјави дека пратениците на Социјал-демократскиот сојуз на Македонија (СДСМ) и коалицијата нема да учествуваат во Собранието се додека Уставниот суд не се изјасни за Специјалното јавно обвинителство (СЈО), јавува Anadolu Agency (AA).
Тој појасни дека опозицијата не го напушта Парламентот, туку нема да учествува во неговата работа, оценувајќи го ваквиот чекор за добронамерен.
„Сите политички партии треба да докажат дека ја поддржуваат работата на СЈО. Ова е особено важно по вчерашното срамно обраќање на Ѓорѓе Иванов. Договорот од Пржино не може да се смета за одржлив без почитување на правото. Единствениот излез е можен само преку владеење на правото, и исполнување на условите за фер, слободни и демократски избори”, рече Заев.
Заев истакна дека ќе бара вклученост на граѓаните во преговарачкиот процес и побара да прекине прогонот на граѓаните што протестираат.„Ако имаат докази дека се спрема граѓанска војна нека ги објават. Тој е должен јавно да ги објави тие докази дека странски разузнавачки служби спремаат војна, а ако не, веднаш нека си поднесе оставка”, рече Заев алудирајќи на вчерашниот говор на претседателот Иванов и додаде дека е стравотно тој да ја споменува армијата во овој контекст.
