Фестивал на светлосна уметност во Скопје

СКОПЈЕ (АА) - Во тек е второто издание на фестивалот „Skopje Light Art District“ - Меѓународниот фестивал на светлосната уметност, во рамките на кој се претставуваат дваесетина уметници, групи и музичари на 18 локации, кои со своите изложби, перформанси и 3Д-мапирања, го осветлуваат центарот на Скопје во различни бои, јавува Anadolu Agency (AA).

Целта на одржување на ваквиот фестивал е да внесе светлина и боја во секојдневјето и да се покаже убавата, шаренолика страна на животот, a сите присутни на фестивалот имаат можност да бидат дел од едно ново и необично искуство.

Следејќи ја „патеката“, од „Куршумли ан“ во Старата чаршија, како и на други локации во чаршијата, преку кејот на Вардар, сѐ до Градскиот парк, заинтересираните можат низ прошетка да ги видат различните светлосни инсталации, осветлените дрвја, како и 3Д-видеопроекциите.

Најавувајќи го овој настан, градоначалникот на град Скопје, Петре Шилегов, рече дека граѓаните имаат можност да видат едно уникатно доживување исполнето со многу бои.

„Skopje light art district“ е меѓународен фестивал на светлосна уметност во Скопје, во организација на Универзална сала, а со поддршка на Град Скопје, Институтот „Јунус Емре“ - Скопје и европскиот проект ROCK - Регенерација и оптимизација на културното наследство во креативните градови, кој е дел од програмата на ЕУ за истражување и иновации - Хоризонт 2020.

Фестивалот беше отворен на 29 мај, а завршува вечерва.