Sena Güler
03 Јуни 2020•Ажурирај: 04 Јуни 2020
АНКАРА
Над 77.000 турски граѓани кои беа ставени во изолација, откако беа евакуирани од странство, успешно го завршија периодот на карантин во студентските домови, изјави турскиот министер за млади и спорт, јавува Агенција Анадолија (АА).
„Граѓаните беа евакуирани во Турција од 97 земји“, изјави Мехмет Мухарем Касапоглу на прес-конференцијата во Министерството во Анкара.
„Турција го започна процесот на нормализација од епидемијата на Ковид-19, по опаѓањето на бројот на заразени од вирусот“, изјави Касапоглу, велејќи дека карантините во студентските домови се успешно затворени.
„Започнавме со подготовка на домовите за речиси 700.000 млади лица“, додаде тој.
Касапоглу изјави дека само 13 отсто од домовите низ Турција биле користени за време на процесот, што се однесува на 177 домови во 76 области.
Тој додаде дека 6.305 здравствени работници биле примени во 113 домови во 56 области, бидејќи не сакале да одат дома и да го ризикуваат здравјето на своите семејства.
Според упатствата на турскиот претседател Реџеп Таип Ердоган, турските иселеници донесени од сите делови на светот биле сместени во студентските домови, во изолација од две недели поради пандемијата.
Касапоглу рече дека Турција е една од најуспешните земји со својата здравствена инфраструктура и третмани и дека исто така станала земја пример во однос на најквалификувана примена на карантин и инфраструктура на студентските домови.
„Бидејќи вирусот потекнува од странство, 14-дневниот карантин наметнат по влезот во земјата беше од витално значење“, рече Касапоглу, додавајќи дека турската инфраструктура на домовите придонела за ефикасно управување со процесот.
Тој рече дека на луѓето кои престојувале во домовите им била укажана голема грижа. Храна, вода, чај, сок и лекови се служеле во нивните простории секој ден.
„Просториите беа редовно дезинфицирани, а беа обезбедени и предмети за лична нега“, рече тој.
На лицата под карантин им биле дадени и спортски материјали и книги за да уживаат во своето време и на некој начин да им се олеснат негативните влијанија на процесот.
За нив била иницирана и активност за садење садници и досега се засадени скоро 45.000 садници.
