Цената на нафтата расте паралелно со стравот за глобалното снабдување

АНКАРА (АА) - Цените на нафтата се зголемија денеска паралелно со стравувањата за глобалното снабдување откако Кина ги прекина мерките на карантин во Шангај, а Европската Унија забрани 90 отсто од рускиот извоз на сурова нафта, јавува Агенција Анадолија (АА).

Меѓународната референтна сурова нафта „брент“ се тргуваше за 116,09 долари за барел [06:10 GMT], што е раст од 0,42 % по затворањето на претходната сесија на 115,6 долари за барел.

Американскиот „Вест Тексас интермедиејт“ (WTI) беше на 115,22 долари за барел, во исто време со раст од 0,48 % откако претходната сесија беше затворена на 114,67 долари за барел.

Лидерите на ЕУ се согласија да намалат 90 % од увозот на нафта од Русија до крајот на 2022 година, со исклучок на нафтата од нафтоводите, кои Унгарија ќе ги користи за транспорт на нафта преку гасоводот „Јужна дружба“.

Рестриктивните мерки против Ковид-19 во кинескиот град Шангај денеска завршуваат по два месеци карантин. Побарувачката за гориво во земјата се очекува да се зголеми, со што се очекува да се зголеми и стравот од сѐ потешкото глобално снабдување.

Во меѓувреме, на страната на снабдувачите, утре ќе остварат средба министрите за енергетика и нафта на ОПЕК предводени од Саудиска Арабија и 10-те земји производители на нафта кои не се членки на ОПЕК, предводени од Русија.

На состанокот ќе се разговара за производствената политика на ОПЕК+ за месец јули. За јуни, ОПЕК + одлучи да го зголеми производството за приближно 432 илјади барели дневно.