Mücahithan Avcıoğlu
27 Март 2026•Ажурирај: 30 Март 2026
ИСТАНБУЛ (АА) – Институциите на Европската Унија (ЕУ) постигнаа договор за пакетот царински реформи кои би наметнале дополнителни обврски за онлајн платформите, и истовремено ќе се воспостави нов царински орган на ЕУ, јавува Анадолу.
Европската комисија денес во соопштение изјави дека преговарачите од Комисијата, Советот и од Европскиот парламент постигнале договор за целосна реформа на рамката на Царинската унија на ЕУ.
Опишан како најдалекусежна реформа на царинските правила на ЕУ од 1968 година, пакетот е наменет да ги приспособи царинските процедури на брзите промени во меѓународната трговија, особено на наглиот пораст во е-трговијата, истовремено поедноставувајќи ги процедурите и подобрувајќи ја ефикасноста преку помодерен систем заснован на податоци.
Во центарот на реформата е новиот царински орган на ЕУ, со седиште во Лил, Франција, кој се очекува да започне со работа во 2027 година. Овој орган ќе ги координира и модернизира царинските практики низ 27 земји членки на блокот, ќе го олеснува споделувањето информации, ќе ја зајакне унифицираната примена на царинските правила и ќе го подобри откривањето и спречувањето на царинските измами.
Исто така, органот ќе управува со Царинскиот центар на ЕУ за податоци, единствена дигитална платформа за царински процедури низ целиот блок, што ќе им овозможи на компаниите да ги доставуваат податоците само еднаш, наместо да ги користат многубројните национални системи.
Реформата дополнително ќе ја зајакне рамката за доверливи трговци, овозможувајќи им на компаниите со висок степен на усогласеност пристап до поедноставени процедури и помал број контроли, додека на царинските органи ќе им овозможи пофокусирано да се насочат кон пратките со висок ризик.
За органот да се справи со големиот бран во е-трговијата, со пакетот се воведува административен надоместок за увезената стока, со цел да се покријат зголемените трошоци со кои се соочуваат царинските администрации, вклучувајќи ги ИТ-системите, кадарот, проверките на податоци и анализата на ризик. Предвидено е таксата да стапи на сила до 1 ноември 2026 година.
Со воведување на новиот систем, онлајн платформите и продавачите ќе бидат обврзани да ги доставуваат податоците за трансакциите до Царинскиот центар за податоци веднаш по извршената продажба, овозможувајќи им на органите да дејствуваат пред стоката да стигне до границата. Платформите, исто така, ќе бидат одговорни за обезбедување на усогласеноста на производите со правилата на ЕУ, при што ќе се применуваат казни во случаи на системска неусогласеност.
Под ревидираните правила, онлајн платформите кои вршат продажба во ЕУ ќе бидат третирани како увозници и ќе се сметаат за одговорни за царинските давачки и безбедноста на производите, при што ќе се наметнуваат казни за оние кои ги прекршуваат регулативите на ЕУ. Се очекува новата царинска легислатива да стапи на сила 12 месеци по објавувањето во Службениот весник на ЕУ.
Во моментов, стоката во вредност помала од 150 евра, увезена од земји кои не се членки на ЕУ, е ослободена од царински давачки. Како привремена мерка, земјите членки на ЕУ веќе одлучија да воведат царинска такса од 3 евра за онлајн нарачките под 150 евра, од земји надвор од ЕУ, почнувајќи од 1 јули 2026 година, додека дополнителниот надоместок следува од 1 ноември, според најновиот договор.
Комисијата соопшти дека во 2025 година директно до потрошувачите во ЕУ биле испорачани 5,9 милијарди стоки со мала вредност, од кои повеќе од 90 проценти потекнуваат од Кина. Блокот веќе извесно време ги разгледува новите давачки насочени кон купувањата направени преку платформи за е-трговија поврзани со Кина, како што се Тему, АлиЕкспрес и Шеин.
