БРИСЕЛ (АА) - Советот на Европската Унија и Европскиот парламент постигнаа привремени договори за продолжување на укинувањето на царината за увозот на стока од Украина на една година, односно до почетокот на јуни 2025 година, пренесува Анадолу.

На пописот на производи и земјоделски култури во областа на т.н. безбедносни механизми, меѓу останатите се додадени житото, живината, јајцата, пченката, шеќерот и медот, објави Советот на ЕУ.

Воведувањето на безбедносниот механизам би требало во иднина да го спречи натрупувањето на европскиот пазар со евтини земјоделски производи увезени од Украина.

Ова е одговор на незадоволството на земјоделците во Европа.

Особено полските земјоделци тврдат дека украинските земјоделци се нелојална конкуренција, поради што неодамна неколкупати ги затворија патиштата кон Украина во знак на протест, па дури и го расфрлија украинското жито.

Ревидираната регулатива ќе се применува од 6 јуни оваа година до 5 јуни 2025 година и се однесува на откажување од сите преостанати царини и квоти на Договорот за асоцијација меѓу ЕУ и Украина.

Со ова ревидирање, според земјите членки, ЕУ ја потврдува својата непоколеблива политичка и економска поддршка на Украина која е соочена со руска инвазија.

Во исто време, ЕУ одлучи да ја зајакне заштитата на чувствителните земјоделски производи со јакнење на заштитните мерки кои веќе се вклучени во актуелната Регулатива за привремени мерки за либерализација на трговијата за да се земе предвид можното негативно влијание врз пазарот на една или повеќе земји членки, а не само на пазарот на ЕУ во целина, како што тоа беше случај досега.

Затоа Регулативата вклучува два заштитни механизми за заштита на пазарот на ЕУ.

Првиот ќе ѝ овозможи на Европската комисија (ЕК) воведување на какви било заштитни мерки доколку се исполнети посебните услови. Новиот механизам на заштита ќе ја обврзе ЕК автоматски повторно да воведе царини доколку увозот на житарки, живина, пченка, јајца, шеќер и мед го надмине просекот од 2022 и 2023 година. Европската комисија, исто така, мора да го интензивира надзорот на увозот на пченица и други житарки, објави Советот на ЕУ.

Привремениот договор сега мора да биде одобрен од Советот на ЕУ и Европскиот парламент.