Шефот на турската парламентарна комисија: Среќни сме што во Северна Македонија има голем интерес за Туркије

СКОПЈЕ (АА) - Претседателот на Комисијата за надворешни работи на Големото народно собрание на Туркије (ТБММ), Фуат Октај, рече дека се многу среќни што гледаат дека во Северна Македонија има голем интерес за Туркије, јавува Анадолу.

На вториот ден од официјалната посета на Скопје, Октај во претседателската вила беше примен од претседателката Гордана Силјановска-Давкова.

Потоа Фуат Октај ги посети училиштата на турската фондација Маариф (ТМВ) во Скопје, каде што се сретна со претставници на турските институции во земјава.

Во изјавата за новинарите Октај рече дека тој и претседателката Давкова размениле мислења за односите помеѓу Туркије и Северна Македонија и за регионалните прашања.

Октај истакна дека на средбата имале можност да ги оценат проблемите на турската заедница во земјата и улогата на Туркије во идните планови на Северна Македонија, изразувајќи го своето задоволство што во Северна Македонија, според него, гледаат многу интензивен интерес за Туркије.

Октај го истакна фактот дека помеѓу двете земји постои соработка на различни полиња, додавајќи дека на претседателката Давкова ѝ ги пренеле своите мислења за формирањето на Високиот совет за стратегиска соработка.

„Многу сме среќни што гледаме дека во Северна Македонија има многу интензивен интерес за Туркије. Овој интерес не е само заедничко наследство, култура и единство што произлегува од историјата, роднинската врска, туку е и однос, решителен интерес што содржи желба ова да се пренесе во иднината“, рече Октај.

Тој рече дека за време на средбите, освен за регионалните прашања, се разговарало и за глобални теми, меѓу кои ситуацијата во Газа, руско-украинската војна и Сирија.

Октај ја пофали работата на училиштата Маариф во земјата, нагласувајќи дека тие претставуваат цврст мост помеѓу Туркије и Северна Македонија, но и со регионот на Балканот воопшто.

Октај истакна дека во Северна Македонија има сериозни турски инвеститори и подвлече дека обемот на трговијата помеѓу двете земји достигнал една милијарда долари и дека нивна цел е две милијарди долари.

Тој нагласи дека кај двете страни видел силна волја за соработка, додавајќи дека како собраниска Комисија за надворешни работи подготвени се силно да придонесат во оваа насока.

Исто така, Октај се сретна и со турски пратеници и политичари во земјата.

За време на средбите во Скопје претседателот на Комисијата за надворешни работи на турското Собрание, Фуат Октај, го придружуваа пратеничката на АК Партија од Газиантеп, Дерја Бакбак, пратеникот на ЏХП од Дузџе, Талих Озџан, пратеникот на АК партија од Газиантеп, Али Шахин и амбасадорот на Туркије во Скопје, Фатих Улусој.