Црна Гора: Претседателот на Турција, Ердоган, пристигна во Цетиње, дочекан со највисоки државни почести

ЦЕТИЊЕ

Претседателот на Република Турција, Реџеп Таип Ердоган, денес пристигна во Цетиње, во рамките на првата официјална посета на Црна Гора, известува Агенција Анадолија (АА).

Турскиот претседател во Цетиње, пред Претседателската палата, беше пречекан од претседателот на Црна Гора, Мило Ѓукановиќ. Ердоган е пречекан со највисоки државни почести, а по свечениот пречек, започна и состанокот на двајцата претседатели. По состанокот, претседателите Ѓукановиќ и Ердоган ќе дадат изјави за јавноста.

Планирано е потоа Ѓукановиќ со својата сопруга да приреди свечен ручек во чест на високиот гостин и неговата сопруга.

Гости на ручекот, покрај членовите на делегацијата, ќе бидат и потпретседателот на црногорската Влада, Дритан Абазовиќ, градоначалникот на Цетиње, Александар Кашќелан, претседателот на Бошњачката странка, Ервин Ибрахимовиќ, и реисот на Исламската заедница на Црна Гора, Рифат Фејзиќ.

Во одвоена програма првата дама на Црна Гора, Лидија Ѓукановиќ, ќе ја угости првата дама на Република Турција, Емине Ердоган. Првите дами ќе го посетат Музејот на кралот Никола во Цетиње и изложбата на платото пред Музејот.

Ердоган во текот на посетата на Црна Гора ќе се состане и со претседателот на црногорското Собрание, Алекса Бечиќ, и со премиерот Здравко Кривокапиќ, а планирана е посета и на џамијата „Низам“ и медресата „Мехмет Фатих“.