Средба Камерон - Османи: Членството на Косово во НАТО неопходен чекор за мирот и стабилноста во регионот

ПРИШТИНА (АА) - Британскиот министер за надворешни работи, Дејвид Камерон, денес престојува во официјална посета на Косово, во рамките на која се сретна со претседателката на Косово, Вјоса Османи, јавува Анадолу.

Како што се наведува во соопштението од нејзиниот Кабинет, на средбата се разговарало за „одличните односи меѓу Косово и Велика Британија, за посветеноста на продлабочувањето на меѓудржавната соработка, зајакнувањето на меѓународната позиција на Косово, како и за безбедносната ситуација во регионот и пошироко.“

Османи му се заблагодарила на Камерон за непоколебливата поддршка од Велика Британија за Косово, вклучително и дипломатската поддршка во процесот на европските интеграции на Косово во меѓународните институции.

Претседателката на Косово ја повторила важноста на членството на нејзината земја во НАТО, почнувајќи од вклучувањето во Партнерството за мир, како неопходен чекор за обезбедување долгорочен мир и безбедност во регионот и пошироко.

Таа ја нагласила важноста на членството на Косово во Советот на Европа за дополнително зајакнување и унапредување на човековите права.

„На состанокот се разговараше и за безбедносната ситуација во регионот и пошироко и во таа пригода Османи го информираше секретарот Камерон за постојаните напори на Србија за дестабилизација, вклучително и за актот на агресија, терористичкиот акт против Косово на 24 септември. Претседателката му се заблагодари на секретарот Камерон за зголемувањето на бројот на британските војници во рамките на КФОР, нагласувајќи ја важноста на соработката за обезбедување на границата со Србија“, се наведува во соопштението.

Се додава дека Османи говорела и за „терористичките групи поддржани од Белград, кои продолжуваат да создаваат страв и заплашување кај српската заедница“.

„Османи истакна дека Косово е пример во регионот во поглед на правата на немнозинските заедници и ја потврди целосната посветеност на земјата на зацврстувањето на секој граѓанин, без правење разлика“, се нагласува во соопштението.