Средба Вучиќ - Цвијановиќ во Белград

САРАЕВО (АА) - Претседавачката со Претседателството на Босна и Херцеговина, Жељка Цвијановиќ денеска во Белград, главниот град на Србија, се сретна со претседателот на оваа земја, Александар Вучиќ, известува Анадолу.

Цвијановиќ на средбата посочила дека нејзината посета на Србија е прва по преземањето на претседателството со Босна и Херцеговина и е одраз на нејзината посветеност за натамошен развој на сеопфатните односи и братските врски со Република Србија, се вели во соопштението од нејзиниот кабинет.

„Цвијановиќ во оваа прилика му се заблагодари на претседателот на Република Србија, Вучиќ, за одличната соработка и поддршка што во континуитет ѝ ја дава на Република Српска, ентитет на БиХ, како и на дејтонската структура на БиХ“, се наведува во соопштението.

За време на средбата, соговорниците размениле мислења и за актуелните регионални прашања, во време на сѐ покомплексна политичка и безбедносна состојба во Европа и во светот.

Укажано е на важноста од постигнување на што поголемо ниво на национално и политичко единство на Република Србија и ентитетот Република Српска, во согласност со Дејтонскиот мировен договор, а со цел за зачувување на виталните национални интереси, вклучувајќи го мирот и стабилноста, се наведува во соопштението од кабинетот на Цвијановиќ.