Со учество на децата, во Собранието на Северна Македонија се одбележа Меѓународниот ден на толеранцијата

СКОПЈЕ (АА) - Со учество и активности на децата, во Собранието на Северна Македонија беше одбележан Меѓународниот ден на толеранцијата, а поздравен говор имаше и претседателот на Собранието, Африм Гаши, јавува Анадолу.

Настанот беше одбележан со работилница за деца од повеќе училишта и од различни етнички заедници.

Децата оставија текстови и обоија различни цртежи, пренесувајќи пораки за толеранција, љубов и соживот.

Во својот поздравен говор, претседателот на Собранието, Гаши, рече дека толеранцијата е една од најврвните човечки особини кои треба да се култивираат, а посебен акцент стави на различноста на етникумите и религиите во Северна Македонија.

„Еве денеска, во ова собрание, преку вас сите, добро е да испратиме порака до сите граѓани на државата, сите пратеници, дека сме заедно тука во оваа држава, заедно ќе ја градиме оваа држава, различните од нас ќе ги гледаме како наши браќа и сестри и заедно ќе ја градиме оваа држава за идните поколенија“, рече Гаши, посочувајќи дека сите треба да се почитуваат без разлика на припадноста.

УНЕСКО во 1995 година го прогласи 16 ноември за Меѓународен ден на толеранцијата и се одбележува секоја година со цел да се подигне јавната свест за опасностите од нетолеранцијата.