Со традиционално дефиле на маски започна Вевчанскиот карневал

СКОПЈЕ (АА) - По повод Нова година според стариот јулијански календар, во Општина Вевчани се одржува традиционалната манифестација „Вевчански карневал“, пренесува Анадолу.

Овој карневал се смета за еден од најголемите уникатни културни куриозитети во Северна Македонија и пошироко, со традиција долга над 1.400 години. Вевчанскиот карневал, кој се одржува по повод Нова година според стариот календар, е познат по тоа што на сатиричен начин, преку разни маски и персонификации, ги претставува настаните од јавниот и политичкиот живот.

Карневалот трае два дена, а утре сите учесници ги палат маските, со симболика дека злото нема да се повтори.

Инаку, Вевчанскиот карневал е стар повеќе од 1.400 години и негува одредени специфични обичаи. „Зетот“ и „Невестата“ се главни ликови-маски на карневалот.

Маските се чуваат во најголема тајност и никогаш не се повторуваат на некој од наредните карневали.