Словенечкиот премиер Голоб: Ситуацијата во Газа е ужасна, итно да се ревидира Договорот за асоцијација меѓу ЕУ и Израел

ЉУБЉАНА (АА) - Словенечкиот премиер Роберт Голоб предупреди за ужасната ситуација во Газа, јавува Анадолу.

Со тоа тој се приклучи кон повикот на ирскиот премиер Сајмон Харис за преиспитување на Договорот за асоцијација меѓу ЕУ и Израел, кој се однесува и на почитувањето на човековите права.

„Целосно се согласувам со изјавата на ирскиот премиер Сајмон Харис за катастрофалната ситуација во Газа и го повторувам неговиот повик за итна ревизија на Договорот за асоцијација меѓу ЕУ и Израел“, напиша Голоб во објавата на социјалната мрежа Х, споделувајќи ја објавата на ирскиот колега.

Во објавата ирскиот премиер Харис, меѓу другото, напиша дека светот е „на прагот на срамен момент и хуманитарна катастрофа“.

Според неговото верување, треба да се искористат сите лостови за да се запре насилството. Ирскиот премиер повика на итна ревизија на Договорот за асоцијација меѓу ЕУ и Израел, кој содржи клаузули за човековите права, велејќи дека е погрешно „ЕУ да продолжи да ги напушта“.

Повикот на Словенија да се испита Договорот за асоцијација меѓу ЕУ и Израел не е нов.

Како што во февруари во Брисел изјави министерката за надворешни работи Тања Фајон, Словенија го поддржува повикот на Шпанија и Ирска до Европската комисија да го разгледа споменатиот Договор со кој се регулираат трговските односи и се врзува со почитувањето на човековите права.

Во својата изјава вчера, објавена на мрежата Х, Харис предупреди и дека овој викенд „сме на чекор до застрашувачката пресвртница од 40.000 мртви во Газа“.

Тој потсети на ужасните сцени од училиштето во градот Газа, каде што, според палестинските власти, во саботата во израелски воздушен напад загинаа речиси сто луѓе. Израелската армија, сепак, тврди дека го нападнала командниот центар на Хамас во училишната зграда и ја демантираше информацијата за бројот на жртви.

Харис, исто така, предупреди дека во десетмесечната војна се изгубени премногу невини животи, повикувајќи на итен прекин на огнот, безусловно ослободување на заложниците и испорака на хуманитарна помош во Газа.

Иницијативата ја започна група европски парламентарци. Иницијативата за ревизија на Договорот за асоцијација меѓу ЕУ и Израел веќе беше дадена во ноември минатата година на претходниот состав на Европскиот парламент од група европски претставници, со Ирецот Бери Ендрјус како прв потписник.

Иницијативата ја потпишаа и словенечките европратеници Матјаж Немец, Ирена Јовева и Клемен Грошељ, кој повеќе не е во актуелниот состав на Европскиот парламент.

Израел во петокот се согласи да ги продолжи преговорите за прекин на огнот во Газа. Посредниците од САД, Египет и Катар повикаа на преговори, кои се очекува да продолжат во четврток, во услови на зголемени тензии во регионот по убиството на лидерот на Хамас, Исмаил Ханије. Кон повикот се придружија ЕУ и неколку западни земји, вклучително и Словенија.