Руско МНР: Сметаме дека би била исправна одлуката Ратко Младиќ да се ослободи од хуманитарни причини

МОСКВА (АА) - Марија Захарова, портпаролка на Министерството за надворешни работи на Русија, реагираше на информациите за лошата здравствена состојба на воениот злосторник Ратко Младиќ, кој во 2017 година беше осуден на доживотен затвор за геноцид и воени злосторства во Босна и Херцеговина, пренесува Агенција Анадолија (АА).

Таа на социјалната мрежа Твитер напиша дека виделе извештаи во медиумите за хоспитализацијата на Ратко Младиќ во Хаг поради нагло влошување на неговата здравствена состојба.

„Сметаме дека би била исправна одлуката Резидуалниот механизам да го ослободи Ратко Младиќ од хуманитарни причини“, напиша Захарова.

Воениот злосторник Ратко Младиќ, кој во 2017 година беше осуден на доживотен затвор за геноцид и воени злосторства во Босна и Херцеговина, поради пневмонија овој месец е пренесен во болница во Хаг, каде што ја отслужува затворската казна.

Ратко Младиќ, командант на поранешната Војска на Република Српска, беше осуден на доживотен затвор во 2017 година, на која поднесе жалба. Во јуни 2021 година, правосилно е осуден на доживотен затвор за геноцид во Сребреница и за други злосторства во Босна и Херцеговина.