Радојчиќ даде изјава во српското МВР во врска со Бањска

БЕЛГРАД (АА) – Донеодамнешниот потпретседател на Српската листа, Милан Радојчиќ, утрово даде изјава во Министерството за внатрешни работи на Србија во врска со трагичните настани во Бањска, Косово, на 24 септември, јавува Анадолу.

Министерството за внатрешни работи соопшти дека тој утрово во 10 часот дошол во просториите на Министерството со адвокат и дал изјава во својство на граѓанин, а извештајот за тоа ќе го објави Вишото јавно обвинителство.

Се наведува дека обвинителството ќе преземе понатамошни процесни мерки и дејствија во негова надлежност.

Радојчиќ вчера во изјавата што ја прочита неговиот адвокат ја презеде врз себе целосната одговорност за случувањата во Бањска, наведувајќи дека немал помош од властите во Србија, ниту пак ги информирал за тоа.

Тој поднесе оставка на местото потпретседател на Српска листа.

Во напад на група Срби на 24 септември, предводена од Радојчиќ, убиен е косовски полицаец, а потоа косовската полиција во антитерористичка акција ликвидира четворица напаѓачи и уапси уште шестмина. Останатите, како и Радојчиќ, побегнаа во Србија.