НИШ (АА) - Во Офицерскиот дом во Ниш, чија зграда ја опколија полициските сили, вклучително и блискиот парк, се одржува состанок на високите претставници на Српската напредна партија (СНП) со нејзиното членство, известува Анадолу.

Демонстрантите од голема далечина гледаат кон Офицерскиот дом, бидејќи паркот пред зградата е блокиран со мобилна ограда и од припадници на жандармеријата. Своето незадоволство тие го искажуваат со бучава со свирежи, труби и вувузели, како и со пароли на транспаренти и со повиците „пумпај“, „бандо арамиска“ и „уапсете го Вучиќ“.

На состанокот, според најавите, ќе присуствуваат премиерот во заминување и претседател на Српската напредна партија, Милош Вучевиќ, претседателката на Собранието, Ана Брнабиќ, и претседателот на Извршниот одбор на СНП, Дарко Глишиќ.

Полицијата била распоредена покрај оградениот простор неколку часа пред почетокот на состанокот.

Штом јавноста дозна за планираната средба, неформална група граѓани повика на собир на плоштадот „Крал Милан“ во центарот на градот во 16 часот, а потоа и на прошетка до Офицерскиот дом. Во исто време, нишката опозиција закажа граѓански собир во непосредна близина на Офицерскиот дом.

Студентите денес повикаа на итен собир кај Црквата „Свети Лука“ и блокада на улицата „7 Јули“ во близина на Офицерскиот дом.

Полицијата претходно најави дека ќе ги преземе сите мерки за безбедно одвивање на сите собири, а најави и нивно снимање.