Претседателот на Управата за верски работи на Турција го предводеше теравих-намазот во Скопје

СКОПЈЕ (АА) - Претседателот на Управата за верски работи на Турција, Сафи Арпагуш, им се обрати на верниците во џамијата изградена од Фондацијата на Управата за верски работи на Турција (TDV) во главниот град на Северна Македонија, Скопје, и го предводеше теравих-намазот, јавува Анадолу.

Арпагуш, во своето обраќање, потсетувајќи на хадисот на пророкот Мухамед, „Муслиманите се како тули на една градба“, истакна дека Возвишениот Бог во Светиот Куран рекол дека верниците се браќа.

Нагласувајќи дека во месецот Рамазан верниците ги споделуваат лебот, љубовта и пријателството, Арпагуш рече: „Сакавме да се сретнеме со нашите браќа во нашата географија на срцето, во Косово, Северна Македонија, Западна Тракија и Бугарија“.

Арпагуш, пренесувајќи ги поздравите од турскиот претседател Реџеп Таип Ердоган и од турскиот народ до верниците во џамијата, изјави: „Она што ни прилега нам е да бидеме обединети и цврсто поврзани како тули на една градба, да бидеме браќа, да се штитиме и поддржуваме во радост, во тешкотија, во тага и во жалост.“

Арпагуш, исто така, однапред им го честиташе на муслиманите во Северна Македонија празникот Рамазан бајрам.

Претседателот на Исламската верска заедница на Северна Македонија (ИВЗ), Шаќир Фетаху, истакна дека во месецот Рамазан Алах им ги простува гревовите на верниците.

Фетаху го изрази своето задоволство од посетата на Арпагуш.

Во меѓувреме, по теравих-намазот, во рамките на Проектот „Мојот подарок нека биде Куранот“, реализиран од ТДВ во соработка со Управата за верски работи на Турција, на верниците им беа подарени Курани.