Admir Fazlagic
13 Април 2021•Ажурирај: 14 Април 2021
СКОПЈЕ
Поранешниот директор на Управата за безбедност и контраразузнавање (УБК) на Република Северна Македонија, Сашо Мијалков, првообвинет во предметот „Трезор“ за злоупотреба на службената положба и овластување, е осуден на единствена казна затвор во траење од 8 години, пренесува Агенција Анадолија (АА).
Пресудата во случајот „Трезор“ денеска ја изрече судскиот совет на Основниот кривичен суд – Скопје составен од Џенета Бегтовиќ, како прва, и Софче Гаврилова-Ефремова, како втора судијка, и тројца судии поротници.
Предметот се однесува на начинот за набавка на британска опрема за следење на комуникациите преку фирмата посредник „Финзи“ од Скопје.
Со денешната пресуда, поранешниот директор на Управата за безбедност и контраразузнавање (УБК), Сашо Мијалков, е осуден на 8 години затвор, Горан Грујевски, поранешен началник на Петтата управа во УКБ, на 15 години затвор, Небојша Стајковиќ, поранешен помошник-министер во Министерството за внатрешни работи, на 5 години и Тони Јакимовски, поранешен началник на оддел во УБК, на 5 години затвор.
Пресудата е првостепена и странките имаат право на жалба до Апелациониот суд во Скопје.
Предметот „Трезор“ се однесува на начинот за набавка на британска опрема за следење на комуникациите. Предметот го отвори Специјалното јавно обвинителство (СЈО), а потоа, исто како и останатите предмети, премина во рацете на редовните обвинителства.
Штетата што била направена на буџетот, а со тоа и имотната корист што ја добила „Финзи“, според обвинението е околу 48,5 милиони денари.
„Финзи“ првин ја купила опремата од фирмата „Гама“, а потоа му ја препродала на МВР за потребите на УБК, каде што директор тогаш бил Мијалков.
Денешната пресуда доаѓа по повеќе од 3 години откако предметот „Трезор“ доби архивско бројче во Судот.
Првото рочиште беше закажано на 5 февруари 2018 година.
Судијката од Основниот кривичен суд Скопје, Џенета Бегтовиќ, заедно со судијата Владимир Туфегџиќ, претходно во предметот „Тврдина-таргет“ за масовното незаконско прислушување ги осудија првостепено: Сашо Мијалков на 12 години затвор, Горан Грујевски на 15 години и поранешниот шеф на Кабинетот на Мијалков, Тони Јакимовски, на 6 години затворска казна.
