Повеќе од милион граѓани родени во Косово живеат во странство

ПРИШТИНА (АА) - Косовската агенција за статистика и Фондот за население на Обединетите нации Косово (UNFPA) одржаа дебата на тема „Миграција - успех за претприемачите, напредок за земјата“, јавува Анадолу.

Според официјалните податоци презентирани на оваа дебата, повеќе од милион луѓе родени во Косово од 1948 до 2022 година живеат во странство.

Директорот на Агенцијата за статистика на Косово, Илир Бериша, рече дека миграцијата е глобален предизвик во кој милиони луѓе во светот се преселуваат од различни социјални, политички и културни причини. Тој истакна дека во 2022 година, околу еден милион луѓе во светот се иселиле од своите земји поради политички прогон, кршење на човековите права или дури и екстремни диктатури.

Бериша рече дека овој феномен го следи Косово со децении, додека пред војната миграцијата била предизвикана од политички фактори на прогон, а по војната во 1999 година од социоекономски фактори.

„Врз основа на последните проценки на Агенцијата за статистика на Косово во 2021 година, Косово има негативно салдо за 38.606 лица. Бројот на пристигнати од странство изнесува 4.221 лице, додека Косово го напуштиле 42.726 лица“, нагласи Бериша.

Тој додаде дека позитивната страна на косовската миграција е поврзаноста на косовските граѓани со својата татковина, дури и откако ќе се населат во разни европски земји, како и инвестициите што ги носат во Косово со повеќе од една милијарда евра годишно.

Висаре Мујко Нимани од УНФПА-Косово рече дека секоја година има зголемување на миграцијата на косовските граѓани, почнувајќи од лекарите и другите професионални профили.

Нимани посочи дека за да се спречи миграцијата треба да се сменат одредени социјални политики на Косово, особено за жените.

„Повеќе од половина од населението, поточно кај жените, имаме голем број невработени и сметаме дека потенцијалот на половина од населението не се користи, дека треба посериозно да се работи на прашањето за вработување на жените. Овозможување пофлексибилно работно време, потоа политики за дневен престој, за згрижување и на децата и на старите лица, чиј товар во нашите семејства главно го носат жените“, нагласи Нимани.

На дебатата беше споменато дека причините за миграцијата може да бидат економски или здравствени, но најмногу е заради подобри услови за живот.