ПРИШТИНА (АА) - Косовското Собрание не успеа да се конституира ниту во 35-тиот обид поради недостиг на доволно гласови за гласањето за претседател на законодавниот дом, јавува Анадолу.

Претседавачот со седницата, Авни Дехари, на 1 мај предложи создавање ад-хок комисија за тајно гласање за позицијата претседател на Собранието, но сите парламентарни групи, освен Движењето Самоопределување, не го поддржаа нејзиното формирање.

Од 94 пратеници присутни во салата, само 51 глас гласаа за формирање на оваа комисија, еден беше против, а воздржани немаше.

„Немаме кворум, се гледаме во понеделник во 11:00 часот“, изјави претседавачот Дехари.

Втората по големина партија во Собранието, Демократската партија на Косово (ПДК), изјави дека уште еднаш е докажано дека за Самоопределување власта е поважна од државата.

Опозицијата континуирано бара Движењето Самоопределување да го смени својот кандидат за претседател на Собранието, но од неговите досегашни изјави за медиумите, вршителот на должноста премиер и лидер на движењето, Албин Курти, изјави дека нема збор за промена на кандидатката Албулена Хаџиу, обвинувајќи ја опозицијата за блокирање на конституирањето на Собранието.

Од потребните 61 глас, кандидатката на Самоопределување, Хаџиу, досега нема добиено повеќе од 57 гласови за претседателка на Собранието на Косово, од кои 48 се од Самоопределување и 9 од пратениците од заедниците. Првата конститутивна седница се одржа на 15 април.

На 15 мај, лидерите на четирите парламентарни политички партии одржаа консултативен состанок со претседателката Вјоса Османи, со цел што побрзо деблокирање и формирање на новите институции по изборите на 9 февруари годинава.

На почетокот на јуни, на консултациите на претседателката Османи со претставниците на политичките партии за локалните избори, е постигната согласност редовните локални избори да се одржат во октомври оваа година. Движењето Самоопределување, исто така, говореше за можноста за одржување вонредни општи избори заедно со овие избори.