Мицкоски: „Турција е еден од нашите најзначајни економски партнери, неизоставна сила со големо влијание во регионот“

ИСТАНБУЛ (АА) - Премиерот на Северна Македонија, Христијан Мицкоски, по средбата со турскиот претседател Реџеп Таип Ердоган во Истанбул, ги пофали односите на земјата со Туркије, јавува Анадолу.

Мицкоски беше примен од Ердоган во Претседателскиот кабинет во Долмабахче, Истанбул. По средбата, на заедничката прес-конференција Мицкоски рече дека со турскиот претседател реализирал „ исклучително значајна и конструктивна средба“.

Тој истакна дека со претседателот Ердоган разговарале за продлабочување на билатералните односи во повеќе сфери, со особен акцент на економската соработка, инвестициите и трговската размена.

„Турција е еден од нашите најзначајни економски партнери, но и неизоставна сила со големо влијание во регионот. Заедничка заложба е да ги зголемиме турските инвестиции кај нас и да создадеме нови можности за македонските компании на турскиот пазар“, истакна Мицкоски.

Тој рече дека разговарано е и за унапредување на соработката во областа на безбедноста, образованието, културата и здравството.

„Двете земји се сојузнички во НАТО, нашиот заеднички приоритет е стабилноста и безбедноста во регионот“, додаде Мицкоски.

Соопшти дека денес со турскиот претседател Ердоган потпишале заедничка политичка декларација за основање на Совет за соработка на највисоко ниво и посочи:

„Ова е значаен чекор за односите меѓу двете земји, а основите на ова се содржани во самиот темелен документ наречен Стратегија за зајакнување на билатералните односи меѓу Македонија и Турција потпишан уште во 2008 година“.

Мицкоски изјави дека со цел да се развие стратешкото партнерство, донесена е одлука за основање Совет за соработка на високо ниво, чија цел, како што истакна тој, е интензивирање на соработката во сите области од заеднички интерес на билатерално, регионално и глобално ниво.

„Советот ќе ја утврди стратегијата за односите помеѓу двете земји во областите на политиката, безбедноста, одбраната, економијата, трговијата, енергијата, транспортот, инфраструктурата, земјоделството и шумарството, комуникациите, туризмот, културата, науката, уметноста, младите, спортот, образованието, здравството, животната средина и дигиталната трансформација“, рече премиерот Мицкоски.

Нагласи дека како држава „сме посветени на градење цврсто партнерство и потврда за македонско-турското пријателство на економски, политички и културен план.“

Мицкоски на крајот посочи дека турската заедница е лојален дел на македонското општество, како што и македонската заедница во Туркије е значаен дел во развојот на турската држава.

Тој изрази увереност дека соработката меѓу двете држави ќе продолжи да се развива во духот на заемното почитување и заедничките интереси со цел обезбедување подобра иднина за граѓаните.