ПРИШТИНА (AA) – Високата претставничка на Европската Унија (ЕУ) за надворешна политика, Каја Калас, по формирањето на Владата на Косово изјави дека е подготвена да организира нова средба во рамките на дијалогот Косово – Србија, пренесува Анадолу.

Во објава на американската социјална мрежа X, Калас изјави дека ова е нов момент за унапредување на односите меѓу ЕУ и Косово, како и на дијалогот Косово – Србија.

„По повеќе од една година политичка блокада, формирањето на новата Влада на Косово е охрабрувачка вест. Честитки до Албин Курти! Сега е важно брзо да се продолжи со спроведување на реформите. Тоа е најбрзиот начин да се деблокира поддршката од ЕУ во вредност од стотици милиони евра и да се постигне напредок на патот кон ЕУ“, напиша Калас.

Синоќа во доцните часови, по конституирањето на Десеттиот состав на Собранието на Косово, пратениците го одобрија новиот владин кабинет предводен од премиерот Албин Курти во неговиот трет владин мандат.