ЕУ и САД за ситуацијата на северот на Косово: Работиме со Вучиќ и Курти на изнаоѓање решение

БЕЛГРАД (АА) – САД и ЕУ денес упатија апел за максимална воздржаност на северот на Косово поради зголемувањето на тензиите меѓу Приштина и Белград, пренесува Агенција Анадолија (АА).

„Европската Унија и Соединетите Американски Држави се загрижени поради континуираната тензична ситуација на северот на Косово“, се истакнува во заедничкото соопштение на канцеларијата на шефот за надворешна политика на ЕУ, Жозеп Борел, и американскиот Стејт департмент.

„Ги повикуваме сите да покажат максимална воздржаност, да преземат итни мерки за безусловна деескалација на ситуацијата, и да се воздржат од провокации, закани или заплашувања“, се додава во соопштението.

Се нагласува дека САД и ЕУ работат со лидерите на двете страни за смирување на тензиите.

„Работиме со [српскиот] претседател Вучиќ и [косовскиот] премиер Курти со цел да се изнајде политичко решение за смирување на тензиите, и да се договориме за патот напред во интерес на стабилноста, безбедноста и благосостојбата на сите локални заедници“, се вели во соопштението.

Последните тензии меѓу Косово и Србија ескалираа по приведувањето на поранешниот српски полициски службеник Дејан Пантиќ под сомнение за напад врз претставници на Централната изборна комисија на Косово.

Протестирајќи за приведувањето на Пантиќ, косовските Срби стојат на барикадите што ги поставија на граничните премини од 10 декември.

Вчера, локалните Срби во северно Косово поставија нови барикади откако косовските власти го условија влезот на српскиот патријарх Порфириј во Косово од соседна Србија пред празнувањето на православниот Божиќ.

ЕУ, НАТО и САД повикаа на деескалација и отстранување на барикадите во северно Косово.