СКОПЈЕ (АА) - Министерството за надворешни работи и надворешна трговија (МНРНТ) информира дека над 690 македонски државјани се евидентирани за евакуација од Блискиот Исток, пренесува Анадолу.

МНРНТ преку соопштение го објави бројот на македонски државјани кои изразиле подготвеност за евакуација од Блискиот Исток.

„Во рамки на процесот на евакуација, во Амбасадата на Република Северна Македонија во Абу Даби се евидентирани 505 македонски државјани, од кои 458 престојуваат во Обединетите Арапски Емирати. Дополнително, 31 лице се пријавени од Кувајт, а 14 лица од Бахреин. Во Доха, заклучно со денес, се евидентирани 141 македонски државјанин“, се наведува во соопштението.

Според соопштението, лицата кои изразија подготвеност за евакуација од Израел се очекува во попладневните часови со владиниот авион да полетаат кон Скопје.

„Во следните денови се очекува да започне реализацијата на враќањето на македонските државјани од Обединетите Арапски Емирати, како и на граѓаните кои се наоѓаат во Катар, Бахреин и Кувајт, за кои е предвидено враќање со организирани летови преку Кралството Саудиска Арабија“, пренесува Министерството.

МНРНТ потсети дека процесот на евакуација се реализира според веќе разработен план, во согласност со безбедносните услови и во координација со надлежните институции.