Грција воведува построги казни за продажба на алкохол и електронски цигари (вејп) на малолетници

АТИНА (АА) - Грција ќе воведе построги казни за продажба на алкохол и електронски цигари (вејп) на малолетници, објавија медиумите денес, известува Анадолу.

„Владата ќе донесе предлог-закон за ова прашање по заедничката одлука на министерствата за заштита на граѓаните, за правда и за здравство“, објави весникот „То вима“.

Оваа одлука уследи по повторените инциденти со продажба на алкохол на малолетници, што неодамна беа на насловните страници откако 8 малолетници во Атина беа хоспитализирани поради консумирање алкохол.

Прекршителите кои ќе им продадат штетни производи на малолетници може да се соочат со затворска казна, парична казна и други административни казни, вклучително и моментално затворање на претпријатието.

„Со зголемени контроли сè станува построго за да се заштитат малолетниците“, изјави министерот за правда Јоргос Флоридис.