СКОПЈЕ (АА) - Денес стотици граѓани маршираа во Скопје во знак на протест против начинот на работење на Универзитетската клиника за радиотерапија и онкологија, јавува Анадолу.
Граѓаните се организираа преку социјалните мрежи, а протестот доаѓа по сомневањата и медиумските известувања за несоодветен третман на пациентите, злоупотреба на дејноста од медицинскиот персонал, крадење и нелегално препродавање на лековите во и надвор од Северна Македонија.
Граѓаните се собраа пред Владата на Северна Македонија, повикувајќи на оставка од министерот за здравство и премиерот на Северна Македонија.
Тие држеа банери на кои пишуваше „Убијци за профит“, „Ова ви е последна доза“, „Колку вреди човечкиот живот“, „Онкологија=геноцид“.
Демонстрантите со црвена боја напишаа „Убијци“ на улицата што минува пред Владата. Еден од демонстрантите, кој рече дека ја изгубил својата мајка од карцином на гради неколку дена по терапијата со хемотерапија, обвини за несоодветен третман и дека требало сам да се грижи за својата мајка.
„Јас за мојата мајка не успеав да се изборам, но ќе се изборам за сите ваши мајки и татковци што боледуваат од рак. Мора да се запре ова лудило, мора на оваа лудило да му се стави крај“, рече тој, обвинувајќи ја Владата дека „не може да ги тргне корумпираните доктори“.
Потоа демонстрантите маршираа до Основното јавно обвинителство (ОЈО), каде што побараа оваа институција кривично да ги гони сите можни инволвирани.
Тие порачаа дека „кражбата на лекови на Онкологија не смее да помине неказнето“, а пред зградата на ОЈО со црвена боја напишаа „Соучесници“.
Некои од демонстрантите во знак на протест фрлаа со јајца кон зградата на ОЈО, а голем број полициски сили формираа кордон и пред Владата и пред Обвинителството.
- Властите повикуваат на судска разрешница, опозицијата бара оставки
Во врска со случувањата во Универзитетската клиника за радиотерапија и онкологија реагираше претседателот Стево Пендаровски. Во соопштението пратено од Кабинетот на претседателот се вели дека „наместо на тие лица соочени со најтешка дијагноза да им даде целосна поддршка и заштита, здравствениот систем очигледно потфрлил“.
Пендаровски повика на брзо и ефикасно комплетирање на истрагата и на судско обвинителско процесуирање без селективност.
Премиерот Димитар Ковачевски, одговарајќи на новинарско прашање, рече дека се работи за „криминал што мора да се расчисти“, додавајќи дека „првпат Министерството за внатрешни работи и Обвинителството влегоа и направија акција во делот на прибирање докази, во врска со јавно изнесени обвиненија и сомненија“.
Брзо расчистување на скандалот побара и министерот за здравство, Фатмир Меџити.
Опозициската ВМРО-ДПМНЕ ја обвини власта дека молчела иако знаела за случувањата на Онкологија со кои се загрозиле човечки животи. Од оваа партија најавија дека за случајот ќе покренат анкетна комисија во Собранието и дека ќе има кривична и политичка одговорност.
